شهقة ملوخية

نظرت له فشعرت بأنه يريد ان يأكل من يدها طبق المحشي و الملوخية المفضلين لديه
فأبتسمت له و ذهبت لتصنع له ما يحب

و بكل حب غني قلبها له بأعذب الالحان و كأنه يناديه ،فلبي النداء
نظر اليها فعرف انها تريد ان تأكل من صنع يده طبق السلطة ذو الخلطة السحرية
أخذا يرسلي لبعضهما اشارات الحب

نظرت له بكل خجل و حب ثم اعدت طبق الملوخية

و في لحظة وضعها لطشة الملوخية

جاء من ورائها وحضن خصرها و وشوشها في أذنها

ثم شهقا سوياّ بكلمات الحب

..............................

هلاوس من المجهول

نجلس سوياّ ثم نشرد، لتخيم علينا هلاوسنا من المجهول

و هل سيكون هذا حالنا بعد سنين نقضيها معاّ ام الحياة ستكون أكثر متعة

و يزداد اللون البنفسجي لينعم علينا حياتنا

اللون الذي يجمعنا سوياّ ، و يمزج كل ما بيننا لنغوص معاّ

لنمتزج في شيء واحد حتي لا يعرف كلانا من كان

نُخترف بأننا لسنا مثلهم و أن الحياة لن تكون هكذا

فنحن لنا صبغتنا الخاصة صبغتنا التي صنعناها في تعوذتنا التي لا مثيل لها

أبتسم لما نُخترف به ، أنظر اليه أغوص فيه

أتحسس ملامحه و كأنني أراها لاول مرة

أشعر و كأن ملامحه تناديني ، يبتسم لي و عيناه تُلح عليّ بسؤال

........................................

باقة ورد

يأتي الي محملاّ بباقة ورد تأخذني دهشتي و أحتار في بهجتها

فتذهب بي الي مكان لم القاه من قبل

أنبهر بكل ما به فأظل أتحسس ملامحه مثل طفل صغير أتولد بلحظتها

أتنفس عبيره استنشقه بقوة حتي أشعر بوجوده بداخلي فأشعر بنشوته

فيرقص جسدي صخباّ ابتهاجاّ به

ثم أنظر حولي و كأن ملاكاّ أنزل بي السكينة

فأرفرف مثل الطير , أحلق كالفراشات علي ساق واحدة

فيضمني بين ذراعيه يطبق علي قلبينا فيدقا دقة واحدة ترج جسدينا

فنعرف اننا تلازمنا الي الابد مهما حاول المجهول

أراني أغوص معه في معاني الورد التي يهمس بها الي

اللون الزهري و الابيض والاورانج و الاحمر

و لفةّ زرقاء و رباط ازرق ملفوف برباط أحمر

الي الابد

........................

Finally found my Utopia , and this is where i'm staying(Part1)

http://didofrgt10.blogspot.com/2010/05/finally-found-my-utopia-and-this-is.html

لازم تقروها :) ;)

صديقي الصدوق

صديقي العزيز الذي يأتي دوماّ و لا يكاد ان يفارقني لحظة

فهو عالق بي حد الجنون و لا يريد ان يذهب بعيداّ عني

أينما رحت او غدوت يلازمني , احدثه بأن يتركني وحدي

لبعض الوقت و أخبره بأن كان حبيبك عسل لا تمطسه الي اخره

و لماذا يفعل هو كمثل الدبة التي قتلت صاحبها من كثرة

حبها و خوفها عليه , و إن زياراته المتكررة لي تتعبني و في بعض الاحيان تقتلني

فأنا لا استطيع تحملها , و لا اقوي علي هذا التلازم القاتل

صديقي البرد اعفو عني و لو لبرهة غادر مكانك الذي احتللته

طوال الوقت كي افيق من معاناتي و يفيق هو من وهنه

و لكي استطيع أن اتحملك في باقي زياراتك التالية

فنحن اعتدنا علي بعضنا و لا نستطع ان نفارق بعضنا الي الابد

و لكنها مجرد هدنة سلام حتي نعاود اللقاء فيما بعد

...........................................................

لماذا انت؟؟؟

في كل مرة اغمض فيها عيناي اجدك

اجدك حتي في احلام يقظتي

اجدك تغتال صور النجوم في صفحات الجرائد لاجد وجهك

و هو ينظر لي و كل ملامحه ترتسم عليها نظرة خبيثة

ليقول لن تستطيعي ان تهربي مني بعد الان

فأنا احتللت قلبك ووجدانك

انظر بإستكبار و عدم تصديق روحي بإنها وقعت

تحت سحرك , حتي قلبي نفذت اليه

نفذت من كل الجدران و الابواب المغلقة بالجنازير

و مفاتيحها الملقاه في البحار

كيف استطعت ان تكسر كل الحواجز و القيود

هل غوصت في اعماق البحار لتجدهم

ام انك سحرت لهم مثلما سحرت لي

فانفتحوا لك و هم مغمضين الاعين

فاجد نفسي وسط هذا الحصار سائله لمااااااااااااذا انــــــــت ؟؟؟؟؟

.............................

احلي الاوقات

فاكر يا وليد واحنا صغيرين لما كنت تمسك بإيدي و تحملني لتضعني علي دراجتك

لاركب امامك لاكون قريبه من قلبك و عينيك و تجري بيا علشان الحق الكورس

اد اية كنت بحس بالامان و انا جوا حضنك

كنت بشعر بالمطبات كأنها بساط تحتي و ان كلكسات العربات اصبحت دندنة العصافير

كنت اشعر وقتها اني طايرة في الهوا

**************

فاكر لما كنت بتاخدنا و نطلع السطوح بعد ان صنعت بيت للارانب ووضعت فيه البرافانات علشان يناموا و يلدوا فيه

و علقتلهم الانوار كانك بتجهز غرفة اولادك و احنا نقعد نذاكر قدامهم

شوية نلتهي عن المذاكرة بالفرجة عليهم و هما بيجروا ورا بعض

واخري نقعد نمعن النظر في لونهم الابيض الشاهق و عيونهم الحمراء

كنت بحب لونهم قوي واضحك لما يقعدوا يعملوا حركات بأنفهم دلالة علي الشمشمة

و لما جبتلي واحد و صممت اني امسكه, قولتلك لا انا بخاف

ساعتها قلتلي ما تخافيش انت بس ملسي علي شعره و هو هايحس بحنيتك

و هايستكين في حضنك ....

***************

فاكر لما كان هايروح عليا الامتحان , وقتها اخدنا الحديث بعد ان سالتني

انت عليكي امتحان اية النهاردة ؟ اخذت تحدثني عن قصص الانبياء

و تفسرلي ايات من القرأن, بعد ان اعددتلي الافطار و الشاي باللبن

وانا اقولك ما تتعبش نفسك انا ما بفطرش قبل اما انزل كفاية الشاي باللبن

صممت اني افطر و قلتلي علشان تعرفي تركزي كويس

الي ان استيقظت اختي و هي تنظر لي مزعورة

انت لسة هنا هايروح عليكي الامتحان انا تنحت و طلعت اجري

**************

فاكرة يا جي جي انا كنت دايما شبهة ليكي في اي خروجة مع بعض او حتي

لما كنت بتيجي تسألي عليا و انا في المدرسة كانوا دايما يفتكروكي مامتي

و انت تقعدتي تقولي يعني انا جبتك امتي !!كنت انت لسة في الجامعة

************

فاكرة لما كنت بجيب الدرجات النهائية في الامتحانات

كنت بتاخديني و تشتري لي شكولاتة كرونا الكبيرة ام فصوص

دي وقتها -زي فريرو روشية - حاليا كنت ببقي طايرة

من الفرح و طول الطريق بغني

*************

فاكرة لما اشتريتي لي موتوسكل في يوم عيد ميلادي

كنت معاكي و ركبته لحد البيت و لما عديت من عند البنزينة

اللي جنب البيت و الراجل قالي امونلك يا عروسة

**************

فاكرة يا نؤة لما رحنا كلنا معاكي رحلة الفيوم اللي منظماها الجامعة

و فضلت طول الرحلة متشالة و طلباتي اوامر من زميلك

لحد ما وصلنا البيت ....كنت انا الكوبري طبعا

و انت و لا علي بالك - لجل الورد بقي- هههه

****************

فاكرة لما فرحك قرب واتفحمت من العياط ما كنتش عاوزاكي

تسيبينا و لية تروحي بيت تاني ما تقعدي معانا

كنت عاوزاكي تقعدي معانا اكتر و ما كنتش عاوزاكي تزعلي

لاني كنت شايفاكي فرحانة و لما سألتيني مالك يا مشمشة

قلتلك طب خليكي قاعدة معانا شوية لحد الامتحانات ما تخلص

مين اللي هايذاكرلي ؟ كنت بتلكك في اي حاجة تقعدك شوية كمان

****************

فاكرة يا إمش لما استفردتي بيا في الشقة لوحدنا

و جبتي اكبر طبق شوربة مليتيه شوربة و رز و لحمة و قلتيلي كلي الطبق كله

و انا اقولك مش عاوزة عملتي فيا اية كتفتي اديا و رجليا

و حطيتي رجلك عليا كاني زي دكر بط و هاتظغطية

وقعدتي تزقي الاكل في بؤي وانا اصرخ و انت تقوليلي ما حدش هايسمعك يا حلوة

و هاتاكلي الطبق كله يعني هاتاكليه هو انت صايمة الدهر كدة علي طول

***************

فاكرة يا ميرا لما كنتي بتوديني و تجبيني من المدرسة

فاكرة لما يوم كنتي هاتتاخري و اخدتيني من غير ما ابوس ماما

و احضنها و لا اخد زمزميتي فضلت طول الطريق اعيط و اقولك ماليش دعوة انا عاوزة اروح

انا ما بوستش ماما و لا ادتني زمزميتي لحد ما وصلنا للمدرسة

و انا مش عاوزة اطلع مع الدادة و مفحومة من العياط

رحتي قلتيلي خدي زمزميتي و لما تروحي ابقي بوسي ماما مرتين

و انا ابدا ما فيش فايدة مش عاوزة اسكت و سبت الزمزمية بتاعتك

في حوش المدرسة و ضاعدت علشان ما اخدش زمزمية مش بتاعتي

لحد ما روحت اخيرا و اترميت في حضن ماما

وانا مش عارفة اخد نفسي من كتر النهنهة اول ما شفتها

************

فاكرة يا ماما زقزقت العصافير كل يوم الصبح مع اذاعة الشباب و الرياضة

فاكرة الدنيا بنت حلوة و انت الجدع

و السندوتشات اللي علي كل صنف و لون كل واحد و اللي بيحبه دلع بقي

اما السندوتشات دي كانت حكاية لوحدها

********

فاكرة لما كنت في الروضة - بيبي كلاس يعني - و الميس اللي بحبها مشيت

و انتوا اتاخرتوا عليا راحت الدادة سارقة سندوتشاتي اخدت منها اللي عجبها

ووزعت الباقي لزمايلي و انا اقوللها طب سبيلي واحد انا جعانة و هي مفترية ابدا

قعدت اتفرج عليهم و هما بياكلوا سندوتشاتي و انا الجوع يقطع بطني :(

***********

فاكرة لما كان بيجي في التليفزيون اي مشهد و ان كان قبلات بين البطل و البطلة

كنتي بتقوللنا اية , روحي هاتيلي ماية او اي حاجة من المطبخ المهم يكون برة الاوضة

و لما نلاقي الماية في الاوضة و ننقولك اتفضلي تتحججي انك مش عاوزها

لانها سخنت او بردت المهم نخرج برة و خلاص

وقتها لم نستطع فهم ذلك و ما سبب خروجنا و حجتك

و لكننا بعد مرور الوقت ادركنا ان اكيد في حاجة مش عاوزانا نشوفها

و احترمنا رغبتك في عدم البوح و عدم إحراجك

و بقينا من تلقاء انفسنا لما نشعر بيكي او بأي مشهد نخرج نغيب برة الاوضة

و نرجع بالماية

***********

فاكر يا بابا لما كنا هانسافر المندرة فاكر الفيلا دي ؟

شفتني و انا ببص علي الفاترينة اللي تحت البيت كل لما ننزل

و سمعتني و انا بوشوش نفسي و بقول حلوة قوي الجلبية دي

فاكر تاني يوم نزلت اشترتهالي و فرحت بيها بس ماما حست انها مش عجباني قوي

و قالتلي اية رايك في اللون كان لونها اصفر قلتلها اصل انا ما بحبش الاصفر

انا كنت عاوزاها فوشيا و قعدت تضحك اني ما قلتلكش ان اللون مش عجبني

نزلت غيرتها و جبتلي الفوشيا كنت فرحانة بيها قوووي و قتها عرفت معني الفرحتين

*************

فاكر اما كنت بتصحينا بالليل علشان ناكل معاك من الفطير الحلو اللي لسة جايبه

و تقولنا قوموا طعمه و هو سخن احلي , الفطير دا كان وصايا

تروح تدي للفطاطري الذبدة البلدي و القشطة و هو يضع فيه خلطته السحرية

اللي لحد قريب ما كنتش عارفة هو محشي اية

فاكر لما كنت بروح رحلات و تحضرلي شنطة الحلويات و اللذي منه

و العصير و لبن دلة -انا رايحة المدرسة فرحانة مفرفشة و معانا لبن دلة من الصبح لحد العشاء - مم

*********

فاكر يا بابا لما قلتلك انا عاوزة راجل زيك و بما ان زيك

لسة ما اتخلقش فدعني اجلس بجانبك او ان الحل بقي اني اعملك استنساخ

ما فيش غير كدة

***********

فاكر يا عمو انا كنت دلوعتك اد اية , فاكر لما كنت بتشيلني علي كتفك

و تمسك رجلي و احضن انا رقبتك و تفسحني و تشتري لي الشكولاتة

لحد ما بقيت كبيرة بردة و لسة بتشيلني , و اي حاجة من غير ما اطلبها تجبهالي

*****************

بحمد الله كتيراّ علي انه رزقني بهذة العيلة

كم انا محظوظة بكم و بوجودكم في حياتي يا من لا طعم لحياتي بدونكم

**********

مستناكوا بقي تشاركوني بأحلي اوقاتكم

اه علي فكرة دي احلي اوقاتي مع عيلتي الصغنونة

استنوني مع احلي اوقاتي مع عيلتي الكبيرة

بس يارب ما تزهقوش مني بقي

توليفة

اهو دا قلبي اللي بيغرق

و اللي سارقه النيــــــــــــــــــــــــل

و لا عارف اجيبه بإيدي

و لا بحبل طويل

مين دا اللي قلبه اتمزع

يتداوي بالمواويل

يا قلبي يا قلبي يا قلبي

رائعة

الابنودي ,الشريعي و علي الحجار