فاكر يا وليد واحنا صغيرين لما كنت تمسك بإيدي و تحملني لتضعني علي دراجتك
لاركب امامك لاكون قريبه من قلبك و عينيك و تجري بيا علشان الحق الكورس
اد اية كنت بحس بالامان و انا جوا حضنك
كنت بشعر بالمطبات كأنها بساط تحتي و ان كلكسات العربات اصبحت دندنة العصافير
كنت اشعر وقتها اني طايرة في الهوا
**************
فاكر لما كنت بتاخدنا و نطلع السطوح بعد ان صنعت بيت للارانب ووضعت فيه البرافانات علشان يناموا و يلدوا فيه
و علقتلهم الانوار كانك بتجهز غرفة اولادك و احنا نقعد نذاكر قدامهم
شوية نلتهي عن المذاكرة بالفرجة عليهم و هما بيجروا ورا بعض
واخري نقعد نمعن النظر في لونهم الابيض الشاهق و عيونهم الحمراء
كنت بحب لونهم قوي واضحك لما يقعدوا يعملوا حركات بأنفهم دلالة علي الشمشمة
و لما جبتلي واحد و صممت اني امسكه, قولتلك لا انا بخاف
ساعتها قلتلي ما تخافيش انت بس ملسي علي شعره و هو هايحس بحنيتك
و هايستكين في حضنك ....
***************
فاكر لما كان هايروح عليا الامتحان , وقتها اخدنا الحديث بعد ان سالتني
انت عليكي امتحان اية النهاردة ؟ اخذت تحدثني عن قصص الانبياء
و تفسرلي ايات من القرأن, بعد ان اعددتلي الافطار و الشاي باللبن
وانا اقولك ما تتعبش نفسك انا ما بفطرش قبل اما انزل كفاية الشاي باللبن
صممت اني افطر و قلتلي علشان تعرفي تركزي كويس
الي ان استيقظت اختي و هي تنظر لي مزعورة
انت لسة هنا هايروح عليكي الامتحان انا تنحت و طلعت اجري
**************
فاكرة يا جي جي انا كنت دايما شبهة ليكي في اي خروجة مع بعض او حتي
لما كنت بتيجي تسألي عليا و انا في المدرسة كانوا دايما يفتكروكي مامتي
و انت تقعدتي تقولي يعني انا جبتك امتي !!كنت انت لسة في الجامعة
************
فاكرة لما كنت بجيب الدرجات النهائية في الامتحانات
كنت بتاخديني و تشتري لي شكولاتة كرونا الكبيرة ام فصوص
دي وقتها -زي فريرو روشية - حاليا كنت ببقي طايرة
من الفرح و طول الطريق بغني
*************
فاكرة لما اشتريتي لي موتوسكل في يوم عيد ميلادي
كنت معاكي و ركبته لحد البيت و لما عديت من عند البنزينة
اللي جنب البيت و الراجل قالي امونلك يا عروسة
**************
فاكرة يا نؤة لما رحنا كلنا معاكي رحلة الفيوم اللي منظماها الجامعة
و فضلت طول الرحلة متشالة و طلباتي اوامر من زميلك
لحد ما وصلنا البيت ....كنت انا الكوبري طبعا
و انت و لا علي بالك - لجل الورد بقي- هههه
****************
فاكرة لما فرحك قرب واتفحمت من العياط ما كنتش عاوزاكي
تسيبينا و لية تروحي بيت تاني ما تقعدي معانا
كنت عاوزاكي تقعدي معانا اكتر و ما كنتش عاوزاكي تزعلي
لاني كنت شايفاكي فرحانة و لما سألتيني مالك يا مشمشة
قلتلك طب خليكي قاعدة معانا شوية لحد الامتحانات ما تخلص
مين اللي هايذاكرلي ؟ كنت بتلكك في اي حاجة تقعدك شوية كمان
****************
فاكرة يا إمش لما استفردتي بيا في الشقة لوحدنا
و جبتي اكبر طبق شوربة مليتيه شوربة و رز و لحمة و قلتيلي كلي الطبق كله
و انا اقولك مش عاوزة عملتي فيا اية كتفتي اديا و رجليا
و حطيتي رجلك عليا كاني زي دكر بط و هاتظغطية
وقعدتي تزقي الاكل في بؤي وانا اصرخ و انت تقوليلي ما حدش هايسمعك يا حلوة
و هاتاكلي الطبق كله يعني هاتاكليه هو انت صايمة الدهر كدة علي طول
***************
فاكرة يا ميرا لما كنتي بتوديني و تجبيني من المدرسة
فاكرة لما يوم كنتي هاتتاخري و اخدتيني من غير ما ابوس ماما
و احضنها و لا اخد زمزميتي فضلت طول الطريق اعيط و اقولك ماليش دعوة انا عاوزة اروح
انا ما بوستش ماما و لا ادتني زمزميتي لحد ما وصلنا للمدرسة
و انا مش عاوزة اطلع مع الدادة و مفحومة من العياط
رحتي قلتيلي خدي زمزميتي و لما تروحي ابقي بوسي ماما مرتين
و انا ابدا ما فيش فايدة مش عاوزة اسكت و سبت الزمزمية بتاعتك
في حوش المدرسة و ضاعدت علشان ما اخدش زمزمية مش بتاعتي
لحد ما روحت اخيرا و اترميت في حضن ماما
وانا مش عارفة اخد نفسي من كتر النهنهة اول ما شفتها
************
فاكرة يا ماما زقزقت العصافير كل يوم الصبح مع اذاعة الشباب و الرياضة
فاكرة الدنيا بنت حلوة و انت الجدع
و السندوتشات اللي علي كل صنف و لون كل واحد و اللي بيحبه دلع بقي
اما السندوتشات دي كانت حكاية لوحدها
********
فاكرة لما كنت في الروضة - بيبي كلاس يعني - و الميس اللي بحبها مشيت
و انتوا اتاخرتوا عليا راحت الدادة سارقة سندوتشاتي اخدت منها اللي عجبها
ووزعت الباقي لزمايلي و انا اقوللها طب سبيلي واحد انا جعانة و هي مفترية ابدا
قعدت اتفرج عليهم و هما بياكلوا سندوتشاتي و انا الجوع يقطع بطني :(
***********
فاكرة لما كان بيجي في التليفزيون اي مشهد و ان كان قبلات بين البطل و البطلة
كنتي بتقوللنا اية , روحي هاتيلي ماية او اي حاجة من المطبخ المهم يكون برة الاوضة
و لما نلاقي الماية في الاوضة و ننقولك اتفضلي تتحججي انك مش عاوزها
لانها سخنت او بردت المهم نخرج برة و خلاص
وقتها لم نستطع فهم ذلك و ما سبب خروجنا و حجتك
و لكننا بعد مرور الوقت ادركنا ان اكيد في حاجة مش عاوزانا نشوفها
و احترمنا رغبتك في عدم البوح و عدم إحراجك
و بقينا من تلقاء انفسنا لما نشعر بيكي او بأي مشهد نخرج نغيب برة الاوضة
و نرجع بالماية
***********
فاكر يا بابا لما كنا هانسافر المندرة فاكر الفيلا دي ؟
شفتني و انا ببص علي الفاترينة اللي تحت البيت كل لما ننزل
و سمعتني و انا بوشوش نفسي و بقول حلوة قوي الجلبية دي
فاكر تاني يوم نزلت اشترتهالي و فرحت بيها بس ماما حست انها مش عجباني قوي
و قالتلي اية رايك في اللون كان لونها اصفر قلتلها اصل انا ما بحبش الاصفر
انا كنت عاوزاها فوشيا و قعدت تضحك اني ما قلتلكش ان اللون مش عجبني
نزلت غيرتها و جبتلي الفوشيا كنت فرحانة بيها قوووي و قتها عرفت معني الفرحتين
*************
فاكر اما كنت بتصحينا بالليل علشان ناكل معاك من الفطير الحلو اللي لسة جايبه
و تقولنا قوموا طعمه و هو سخن احلي , الفطير دا كان وصايا
تروح تدي للفطاطري الذبدة البلدي و القشطة و هو يضع فيه خلطته السحرية
اللي لحد قريب ما كنتش عارفة هو محشي اية
فاكر لما كنت بروح رحلات و تحضرلي شنطة الحلويات و اللذي منه
و العصير و لبن دلة -انا رايحة المدرسة فرحانة مفرفشة و معانا لبن دلة من الصبح لحد العشاء - مم
*********
فاكر يا بابا لما قلتلك انا عاوزة راجل زيك و بما ان زيك
لسة ما اتخلقش فدعني اجلس بجانبك او ان الحل بقي اني اعملك استنساخ
ما فيش غير كدة
***********
فاكر يا عمو انا كنت دلوعتك اد اية , فاكر لما كنت بتشيلني علي كتفك
و تمسك رجلي و احضن انا رقبتك و تفسحني و تشتري لي الشكولاتة
لحد ما بقيت كبيرة بردة و لسة بتشيلني , و اي حاجة من غير ما اطلبها تجبهالي
*****************
بحمد الله كتيراّ علي انه رزقني بهذة العيلة
كم انا محظوظة بكم و بوجودكم في حياتي يا من لا طعم لحياتي بدونكم
**********
مستناكوا بقي تشاركوني بأحلي اوقاتكم
اه علي فكرة دي احلي اوقاتي مع عيلتي الصغنونة
استنوني مع احلي اوقاتي مع عيلتي الكبيرة
بس يارب ما تزهقوش مني بقي
15 comments:
تصدقي يا مشمش ....إني مكنتش أعرف حاجات كتير عنك وإنتي صغيرة !!! أكتر حاجة فاكرهالك إنك كنتي ولا زلت ما بتحبيش الجبنة بأنواعها وزمان راجي حطلك بين بياض البيضة وصفارها وهي مسلوقة حتة جبنة وأنتي مش واخدة بالك ،!!! بس إنتي فقستينا وكانت محزنة
ربنا يسعد أوقاتك يا مشمش ؛ حقيقي الدنيا حلوة بالناس إللي بنحبهم ربنا يخليللنا حبايبنا ويطول في عمرهم للوقت إللي نقدر نتحمل فراقهم
صباح ذكريات شريف
ديدي
ya shosho fakra lma kont bakol menk el sandwitshat loooooooooooooooool bas zekryat 7elwa walhe fakrtene bel laze mada
مشى ياهند ياصبرى انا مالى انا عايزة الزمزمية بتعتى مليش دعوة بس بصرحة اتا بجد زعلانة منك اوى من طريقة التعامل معاية شكرا يا ستى وانا هابقى برضو الكبيرة برضو
قطتى
نسيت اقول احلى اوقاتى كانت فى الحلمية احلى الايام لسه كنت بقول لامش عن المدرس جاسر يا ساتر يا رب ولا زينب نصر كانت بتضرب بس واللهى كنت بحبها اوى بس كنتى قرفانى انا رايحة المدرسة خذى اختك معكى وتاخرنى برضو وكنت بنظف الحوش
قطتى
شئ جميل أن نتذكر الماضى
ولكن من الصعب أن نعبر عنه بهذة الصورة الرقيقة أو بهذا الاحساس
يجب أن يكون انسان ذات قدرات و مشاعر واحاسيس خاصة
يعنى من الأخر انسان حلو من جوه
محمد احمد
شيمو حبيببتى:ما احلى اوقاتك واحلى ذكرياتك.. عارفة احلى حاجة ايه انك قادرة تحتفظى بطفولتك لحد دلوقت لدرجة انى طول البوست شايفة البنونةذات العيون الشقية التى ترصد وتحلل وتنتقى ما يحدث حولها باحساس طفلة اسعدها زمانها بوجودها آخر عنقود طويل لتكون هى سكره المعقودفتستمتع بأمومة الكل حتى ولو كان الفرق بضع سنوات ربنا يخليكم لبعض ولى انا كمان اكيد فى ذكريات كتييير فياريت كمان وكمان .......حانستناك
Reading through your post made me remember my good old days :)
You're really lucky to have a family that loves you this much, and they are lucky that you love them back at the same rate and maybe more from what you wrote
Thank god everyday for having such a great family, wrabena y5aleko lba3d wtefdalo dayman orayeben mn ba3d :)
I love it when me and my family sit down together and start talking about the old days and rememeber the old days
As for my happiest times, I have many thank god :D but my best memory was when tant Layla used to come to our house back in Kuwait, and take me and my sister to the beach to eat Ice Cream from Fares :) I was 4 years old then, and it's one of the few things I remember from my days in Kuwait! It was the best Ice Cream ever, I can still taste it in my mouth :D
ديدي
فعلا الدنيا بتحلو بالناس اللي بنحبهم و يحبونا بجد من جواهم انا فاكرة لما كنت بقعد عندكم و ابية محمود الله يرحمه كان يقول يا زبدة اعملي لشيماء ملوخية و هاتيهالها في جردل علشان تاكلها بالجردل و الكبشة اصل انا بعشق الملوخية و كانت ماما علشان تاكلني لازم تعملي ملوخية كل يوم مع الاكل و فاكرة الرسومات التحفة اللي كان بيرسمهالي و يعلمني ارسم ازاي و مشروع التخرج اللي رسمهولي يااااااااه حاجات كتير قوي
و بسكويت لوكس
بحبكو جدا جدا و ربنا ما يحرمناش من بعض و دايما مع بعض
ااااااااامين
ديدي
اه نسيت اقول عرفت بقي انا ما بقتش بحب البيض لية علشان كدة انا كنت فاكرة بردة اني كنت باكله زمان لكن معرفتش اية اللي حصل و خلاني ما احبوش و اديني عرفت نورت المحكمة
;))))
rehab
لا يا بيبي مش فاكرة
هو انت اللي كنتي بتاكلي مني السندوتشات بردة و لا انا اللي كنت بوزعها علشان ماما كانت بتعملي اد كدة و لازم كنت اروح من غيرهم علشان ما تزعلش و انا ما اقدرش علي زعلها ابداّ
وحشتيني قوي و نفسي اشوفك بوسة كدة مؤقتاّ
muuuuuuuuuuuuuuuuuuuuuuuuuuuuh
قطتي
يا باشا انت تامري باي حاجة تأمر تطاع انا اقدر اتاخر عليكي يا حببتي
دا انت اللي مهيأنا امرك ياللي بتجبلنا اللحمة البتلو :)))))
مع ان اللحمة دي مش تخصصك :))
و بعدين انا اجرؤ ازعلك بردة دا انا غلبان و بينضحك عليا بسهولة
اه و نبي ما ينبكيش فيا ثواب و تعرفيلي حتة بتعلم الخباثة علي حبتين من بتوع اليومين دول
اصل الزمن دة ما بنفعش فيه غير كدة و بالمرة ابقي تعالي معايا ما هو الحال من بعضه
ساعات كتير بسال نفسي هو احنا ماما ربتنا زيادة و لا احنا جينا مش في زمنا و لا اية بالظبط
مجمد احمد
الله يكرمك يا اخي بس دة كتير عليا ما استاهلش انا كل دة بجد اخجلتم تواضعنا
بس دة هروبا بقي انك تحكي حبة زكريات صغنتوتة ما ليش دعوة
مستنيا انا بقي :(((
زوجة جداّ
بحبك قووووووووي و بموت في تعليقاتك اللي بتاخدني كدة
دي ميزة اخر العنقود بيبقي دلوعة الكل و يحظي بحنان الكل و لكن حظي الاكبر ان ربنا رزقني بيكم
و ربنا يخلينا لبعض و ما ننحرمش ابدا من بعض
يااااااااة يا زهرتي دا احنا لينا ذكريات كتير معاكي و مع ابية احمد ابية احمد اللي اسمة ابية احمد :))
DiDo
بحمد الله كثيرا برزقي باسرتي الجميلة و التي طالما حمدت الله لن اكفي ما انعمت به
و ربنا يخليلك طنط ليلي و كل الطنطهات :)
i like the last statment gamda
Post a Comment