بما اني ساعات و ساعات بس مش ساعة تروح و ساعة تيجي لا اوعو تفتكروا كدة , النهاردة هاحكلكم علي موقف عجيب و محرج ويفطس من الضحك في نفس الوقت , و انتوا كمان هاستني اسمع منكم مواقف حصلتلكم , بس الموقف كالاتي :
صحيت الصبح الساعة سابعة و نص علشان الحقل باص الشغل , لبست هدومي و ظبط التظابيط وصليت و نزلت وقفت تحت العمارة استني الباص الساعة تمانية و نص الا خمسة لحد ما بقت وي نص , قولت ما بدهاش بقي شكله زوغ و ماجاش و رنيت علي اختي علشان اروح سوي و عديت علي الصف التاني علشان اركب و قولت لنفسي بالمرة اجيب فينو من المخبز يلا اهي كل تاخيرة و فيها خيرة برده , هاعمل اية ما هي بايظة بايظة و انا كدة كدة نزلة بدري .
و بعد ما جبت الفينو شاورت للميكروباص ايون جينا للصميم , ركبت و ما قلكمش بقي علي اللي حصل اول ما ركبت ما فيش فسواية صغنونة و رحت شدة الباب قوم اية الباب طلع في ايدي تقولوش جاكي شان و انا معرفش , وراح السواق يشخط و يبرطم و يقول هو كل واحد يركب عاوز حد يقفله الباب اية النيلة دي , و نزل يعدل الباب و هو عمالي يبرطم و مش عاوز يسكت لحد ما ركب و راحت الست اللي جنبي قيلاله خلاص طالما انت مش عجبك كدة خلية اوتوماتيك , و انا مش اتنيل و اسكت لا ازاي ودي تيجي برده رحت قيلاله اصلا الباب بايظ , و كنت دفعت الاجرة للراجل اللي حنب السواق , و راح السواق يدور الميكروباص مش عاوز يدور يدورة مش عاوز يدور و العربيات تذمر , و انا بقي كان شكلي زبالة و كنت هانزل تحت الكرسي و في سري اقول ياربي في اية هو اية اللي بيحصلي دة علي الصبح و السواق شغال في البرطمة و مش عاوز ياخد الاجرة اللي بعتهاله من الراجل , انا قلت بس السواق هايرميني برة الميكروباص و يقوللي اتفضلي يا انسة دا لو قالهالي اص يا انسة بالذوق يعني- مش رايح في حتة و هايبقي منظري ازبل من الزبالة و اخيراّ و بعد عناء دارت العربية و بلعت ريقي , و لما نزلت اذ فجأتناّ لقيت شعري بيطير قدامي و انا مش عارفه اودية فين ؟!!! و لما دخلت عمارة اختي عقبل عندكم عندها مرايات في مدخل العمارة "دة للي ما عندوش" قوم اية ابص في المرايا علشان اخبي شعري و تنحت ... الاقي جاكيت التايير مفتوح تقولوش كنت في خناقة و لا ركبة اتوبيس الحكومة ساعة الضهرية , و لا اية لابسة تايير ابيض و متألقة علي الاخر في يوم عفرة علي الاخر .......
شوفتوا بقي " ياحلولي يا حلولي و دة اية دة اللي بيحصلي"
الحمد الله انها جت علي اد كدة
ما حدش بياكلها بالساهل ههههههههههههههههههههههههههههههههههههههه
7 comments:
دة اية الحلاوة دية الراجل مش عايز يقول اية الوشوش دة على الصبح يا فتاح يا عليم وكان محترم للنهاية بدليل انة مش عايز ياخد الاجرة الى ان ربنا كسفة والعربية دارت احمدى ربنا ومن الاخر حاولى تصحى بادرى علشان تنزلى بادرى وتلاقى الباص بتعاعك ارحم واهو بكرامتك بردة والحمد لله ان فى عمارة اختك فى مرايات لحسن كانت تبقى شرارة خالص امش
يا شخابيطك يا شيموووووو:
صحيح ماحدش بياكلها بالساهل ؛؛.
أنا أعدت أفكر و أعصر مخي علي موقف حصللي و إفتكرت حاجتين -واحد حصل زماااان وإحنافي إبتدائي أنا و أخويا كانت مدرستنا في العباسية مش الصفرا!!!- وكنا ساكنين في عين شمس كنا بنجاهد كل يوم في المواصلات وكانت رحلة الشقاء بتبدأ من الفجر ،حتي إن أخويا كان بيلبس هدوم المدرسة تحت البيجامة !!!؟؟-مطولش عليكوا صحينا ولبست ونزلنا الشارع ، كنا بنمشي مسافة شارعين كبار علشان نوصل لموقف الأوتوبيس في الألف مسكن وطول محنا ماشيين بنبص لبعض ؛هو الشارع فاضي ليه فين البشر بتوع كل يوم ؟؟عدينا علي عربية فول والناس تبصلنا و تضحك !!!وأخيرا بتاع الجرايد إللي في الموقف لما اللنا -إنتوا رايحيين فين يا أفنديا النهارده أجازة!!!؟؟؟؟؟
ماتسألونيش كانت أجازة بمناسبة إيه وإزاي إحنا معرفناش - الظاهر كانت أجازة علي غفلة!!!ماما يا عيني كانت بتسمع الراديو بعد ما نزلنا فعرفت بالأجازة ؛ لبست ونزلت جري علشان ترحمنا من رحلة العذاب واعدت تدور علينا في الأوتوبيسات بس إحنا كنا روحنا من طريق تاني شاريين فطار وعيش إفراج يا إخوانا بأه ؛؛؛؛
والله كانت أيام جميلة رغم كل شيء
الموقف التاني بأه كان قريب من شهرين كده و كان يوم جمعة وانا ليه طقوس خاصة لليوم ده ؛من زيارة لحبايبي وإديت إللي فيه النصيب ،خرجت مع آذان الجمعة لإصلي في مسجد السيدة عائشة كالمعتاد وانا في طريقي بفتح شنطتي أجهز فلوس لخادم الجامع ملائتش ولا نكلة !!!؟؟اعدت في الجامع أفكر هتصرفي إزاي و سيبتها علي الله - اعدت جمبي واحدة ومعاها ابنها اتكسفت اطلب منها جنيه اروح بيه خصوصي كان في الجامع واحده ضريره بتشحت وكنا مستنكرين بجاحتها ؛ خلصنا صلاة وخرجنا وانا كنت بدور في الأرض علي فلوس مش بتحصل إنك تلاقي وتكون مش محتاجها ساعتها لكن ربنا كريم حكيت لسواق المكروباص فركبني ولله لسه برده في شهامة في رجالتك يا مصر ؛وحلف ميت يمين ما ياخد فلوس من امي إللي استننتني بفلوس في الشارع بعد ما حكيتلها في التليفون .صدعتكوا انا آسفة جدااااااا
لاحظتوا حاجة ماما شايلة همنا علطلول؛الله يديمك فوق راسنا وياخد من عمرى ويديكي ..
ديدي
تفتكرى ان كل اللى حصل ده طبيعى يا شوشو
أكيد طبيعى يبقى انت اكيد فى مصر
بيبو
مساء الخير
اية دة طارق علام يانس قاعدة بتفرج عليه حصلى موقف من زمان موقف فى المكروباص ركبت الميكروباص وفجاة توقف والسواق قال اصتبحت بوش منين النهاردة انزلو مش طلع ادى اليوم وسيبك بقى الستات من الى طلع بس نحس الباص وانا ولاانا هنا ونزلنا وبعد ما الستات نزلت العربية اشتغلت والسواق قال اركبى يا انسه وطلعت مش انا النحس الحمدلله وروحت الشغل متاخرة وانا الى معى المفتاح المكتب والناس قاعدة مستنية
قتطى
اولا اهنيك على البوست الجميل ده وبجد اسلوبك جميل ودمك خفيف ومستنى حاجت تانى اجمل . بالنسبه لموضوع الميكروباصات والسواقين دول موال زى مانتى حكيتى كده تحسى انهم ناس غريبه ولا الاغنانى الغريبه الى بيشغلوها ناس تانيه خالص الله يكون فى عونا لما نركب الميكروباصات ديه . انا بقى الموقف الى حص معايا كان فى اتوبيس وديه كانت اخر مره اركب اتوبيس واليوم ده كان قبل ماشتغل بيوم وكنت رايح الشغل كان تدريب قبل ماشتغل المهم ركبت الاتوبيس وقاعد طول السكه ومرتاح جت المحطه قومت قبليها بسنه وانا نازل خلاص لقيت المحفظه اتسرقت منى اتجننت يا اسطى وقف الاتوبيس اتسرقت محدش شاف المحفظه بتاعتى ولا حد هنااا والاتوبيس مشى محطتين قومت نازل وقولت عوضى على الله وانا عمال اشتم فى الى سرقها والناس كلها ربنا يرحمنا من الموصلات والقرف ده بس هى ديه مصر ومفيش جديد . سلاااااااااام
صباحك معطر بالنسبة لموقف من المواقف بصى بقى يا ستى موقف انا واخويا حبيبى احنا ياست قريبين من بعض قوى وخصوصا واحنا صغيرين مرة من المرات واحنا بناخد كالعادة المصروف روحنا اخدنا بعضينا وروحنا نشترى حلويات بس المرة دة قولتة تعالى نغير الراجل دة ونجيب من حد تانى احسن وفضلنا ماشين مسافة طويلة مش عارفة بالظبط اد اية لغاية ما توهنا ومعرفناش نرجع وهو قعد يعيط وانا اقولة اية ها يعرفوا يلا قونا بس لاقنا راجل كبير ولما شاف اخويا بيعيط سالنا انتو منين طب تعالو معايا وروحنا معاة وكلنا وشربنا وقعدنا ونسينا اننا تايهين ويعينى على ماما وبابا وباقى العيلة خرجو يندهو علينا فى الشوارع واحنا ولا هنا طبعا ما احنا كلنا وشربنا ونمنا كمان فية اية تانى بقى لغاية لما لقونا وكانت علقة بعدها ما اقولكيش اصل دة اخويا حبيبى اللى بيسمع كلامى وانا الكبيرة بقى شوفتى امش
la hoal wla koat el bellla ana mesh kadr abat d7ak ya shosho manour ya abdalllahhhh
Post a Comment